15.8 C
Скопје
29. март 2024
Centar.mk – Вести, бизнис, забава, спорт…
БИЗНИС

Гувернерката на НБРМ на конференција на Банката за меѓународни порамнувања во Швајцарија

Гувернерката на Народната банка на Република Македонија, Анита Ангеловска-Бежоска, денеска и утре во Швајцарија учествува на два настана на Банката за меѓународни порамнувања (БИС), важни за развојот на меѓународната соработка во областите на монетарната и финансиската стабилност и за унапредување на комуникацијата меѓу централните банки за клучните теми што го засегаат централнобанкарското работење на глобално ниво.

Денес, таа учествува на 17. годишна конференција на оваа најстара меѓународна финансиска институција, на која во Цирих гувернери и експерти од централните банки, високи претставници на Светската банка и Меѓународниот монетарен фонд (ММФ) и универзитетски професори и истражувачи дискутираат на тема „Десет години по големата финансиска криза: што е сменето?“ Претпладневните сесии на конференцијата беа посветени на карактеристиките на новиот глобален финансиски систем и на прашањето дали во изминатите десет години на светско ниво се промени инфлацискиот процес – начинот на формирање на цените, нивната динамика и фундаменталните врски со нивните главни детерминанти. Попладнево учесниците ќе дискутираат за тоа дали сега, по завршувањето на кризата, глобалниот финансиски систем е поотпорен на шокови од претходно. Одделна сесија ќе им биде посветена и на клучните предизвици во координацијата на меѓународната политика што ја спроведуваат централните банки.

Оваа конференција е еден од неколкуте настани преку кои БИС секоја година ја остварува својата улога на форум за дискусија и анализи меѓу централните банки и меѓу факторите на меѓународната финансиска заедница воопшто. Учеството на гувернерката Ангеловска-Бежоска на годинешново издание на овој традиционален настан е уште една потврда на определбата НБРМ и натаму да биде активен учесник во ваквите дебати и анализи што се клучни за монетарната политика и монетарните движења во глобални рамки.

Во текот на утрешниот ден гувернерката на НБРМ ќе учествува на 88. годишно генерално собрание на БИС, кое секоја година се одржува во Базел. На собранието ќе учествуваат високи претставници на шеесетте централни банки и монетарни институции кои членуваат во БИС и имаат право на глас и учество на ваквите собири, меѓу кои е и НБРМ. Гувернерката Ангеловска-Бежоска ќе го искористи учеството на собранието и за билатерални средби со повеќе гувернери на централни банки што се членки на БИС поради унапредување на позицијата на НБРМ во меѓународната централнобанкарска заедница.

Спонзорирано: