На неколку средби со претседателот Ѓорге Иванов се обидов да го мотивирам да стави потпис на законот за јазиците поради тоа што се крши Уставот, а парламентот е блокиран во извршувањето на својата функција преку овој закон, изјави премиерот Зоран Заев на новинарско прашање кога ќе има договор за овој закон за тој да биде објавен во „Службен весник“ и да стапи во сила.
Според Заев, Иванов со непотпишувањето на законот испраќа порака дека може да стави џебно вето на кој било закон.
„Тоа испраќа порака дека претседателот може да си одлучи кога сака и кој закон сака да го стави во таканареченото џебно вето. Тоа не е функционална демократија. Одговорноста е преголема. Овде се крши Уставот. Само ја користам пригодата да апелирам да се стави потписот и да се повикаат институциите, Уставниот суд, да се обратиме до Венециската комисија. Тие се тие надлежни за она што треба да го кажат“, рече Заев и истакна дека Уставниот суд е тој што кажува дали нешто е уставно или не.
И да има нешто неуставно, додаде тој, и да има нешто проблематично, секојпат може да се промени. „Но, законот мора да дише. Ако законот дише, верувам дека растоварени од одредени права досега, ќе можеме многу посилно да влеземе во вака најавениот процес на отворање поглавја, почеток на преговорите за Македонија, тогаш ќе можеме да бидеме со 100 отсто фокус на она што е важно за сите граѓани“, истакна Заев.
