Надлежните медицински служби преку родителите ја известиле детската градинка „Пролет“ во oпштина Карпош, која се наоѓа во населбата Козле, дека две деца што престојуваат во нивната установа се заболени со вирусот коксаки.
Управата на градинката „Пролет“ веднаш го известила Центарот за јавно здравје, односно одделението за епидемиологија, по што била извршена дополнителна дезинфекција во групите каде што престојуваат децата, како и во другите простории на објектот.
Како што информираат од Општина Карпош, преземени се сите мерки неопходни при вакви случаи. Покрај тоа, превентивно, според протоколот, специјалист извршил прегледи и врз другите деца, при што било констатирано дека вирусот коксаки не бил проширен меѓу нив.
Престојот во градинката се одвива без прекин, со вообичаената динамика и без дополнителни пречки.
