Во 15.05 часот невреме ги зафати Ресен и атарите на селата Евла, Долно и Горно Дупени.
Центарот за управување со кризи информира дека овие региони беа зафатени со невреме проследени со врнежи од град, кое траеше 10-ина минути и зафати површина од 800 до 1.000 хектари.
Исто така, беа зафатени и атарите на селото Царев Двор и Дрмени. „Според актуелните радарски слики, на повеќе места во источните и југозападните делови од земјава, особено во планинските подрачја, има нестабилна облачност со пороен дожд и грмежи. Поизразена нестабилност со интензивен пороен дожд и грмежи има во северниот дел од Пелагониската Котлина, односно во Прилепско, во Преспанскиот, Гостиварско-кичевскиот, како и во Гевгелискиот Регион, а исто така и во Кратово-Пробиштип. Во југозападните делови според радарските слики локално можно е да имало појава на град“, информира ЦУК.
Нестабилното време со локален пороен дожд и грмежи ќе продолжи и во попладневните часови. Стабилизирање на времето ќе има во вечерните часови.
Од УХМР известуваат дека денес на повеќе места ќе биде нестабилно со пороен дожд и грмежи. В петок и в сабота ќе има локална појава на пороен дожд со ретки грмежи, но процесите се очекува да бидат послаби. Потоа, и во следните денови времето ќе биде променливо облачно со повремени врнежи од дожд и појава на грмежи, а процесите ќе бидат со променлив интензитет.
