15.8 C
Скопје
29. март 2024
Centar.mk – Вести, бизнис, забава, спорт…
МАКЕДОНИЈАТОП ВЕСТИ

Димитров на состанок со колегите од Грција, Албанија и Бугарија во Солун

Министерот за надворешни работи, Никола Димитров, на покана на својот грчки колега Никос Коѕијас на 3 и 4 мај во Солун учествуваше на третата по ред четирипартитна средба на министрите за надворешни работи на Република Македонија, Грција, Република Албанија и Република Бугарија.

На средбата, покрај министрите за надворешни работи учествуваа и министри и високи претставници од министерствата за внатрешни работи и за транспорт и врски од четирите земји. Во дискусијата министрите за надворешни работи се осврнаа на предизвиците за регионот на Југоисточна Европа, од состојбите на Блискиот Исток и Источниот Медитеран, последиците од движењето на бегалците/мигрантите кон Балканот, иднината на Европа и интеграцијата на земјите од Западен Балкан во ЕУ.

Претставниците од министерствата за внатрешни работи и транспорт дискутираа по прашања од областа на прекуграничната соработка, вклучително полициската, царинската и цивилната заштита, како и меѓусебното поврзување и транспортното умрежување во регионот.

На состанокот на министрите за надворешни работи од земјите учеснички беа донесени заклучоци за понатамошни конкретни иницијативи и за практичната соработка во повеќе области од заемен интерес, како што се интерконективноста, високото образование и европските и евро-атлантските интегративни процеси.
На маргините на состанокот министерот Димитров имаше одвоена билатерална средба со министерот Коѕијас, на која продолжија разговорите за надминување на разликата околу името.

Димитров имаше работен појадок со бугарскиот заменик-претседател на Влада и министер за надворешни работи, Екатерина Захариева, на кој, меѓу другото, дискутираа и околу напорите за започнување на пристапните преговори со ЕУ по чистата препорака од ЕК и за имплементација на Договорот за пријателство, добрососедство и соработка.

Спонзорирано: