Воведуваме зелена нафта преку кофинансирање на трошоците за набавка на гориво за земјоделска механизација. Ова го најави денеска на прес-конференција Диме Велковски, пратеник на СДСМ и коалицијата во Собранието.
„Над 54.000 земјоделски стопанства, кои имаат евидентирано земјоделски површини во Единствениот регистар на земјоделските стопанства во Министерството за земјоделство шумарство и водостопанство, ќе набавуваат поевтино гориво за својата механизација. Мерката со која се помагаат земјоделските стопанства е во висина од 50 проценти од трошоците за набавка на гориво за земјоделска механизација, но не повеќе од 100.000 денари за земјоделско стопанство. Финансиската поддршка што ќе биде обезбедена од буџетот на Република Македонија ќе биде во висина од 310 милиони денари годишно“, рече Велковски.
Додаде дека со оваа мерка значително ќе се намалат трошоците, ќе им бидат олеснети условите на земјоделците, а производството ќе стане поконкурентно.
