Новоизбраниот јавен обвинител, Љубомир Јовески ветува дека ќе ја врати игубената доверба во Јавното обвинителство. Тој се заблагодари на укажаната доверба за неговиот избор и рече дека тоа за него е голема чест, но и одговорност.
„За мене тоа е голема чест и одговорност. Обвинителството е пред голем предизвик да ја вратам изгубената доверба. Ја уверувам јавноста дека Обвинителството ќе се дистанцира од извршната власт и други центри на моќ и ќе биде самостоен државен орган надлежен за гонење на криминалот. Ја гарантирам самостојноста во работата на обвинителите и инсистирам да го истражуваат и гонат криминалот врз основа на факти и докази. За време на вршењето на функцијата ќе го почитувам Уставот и законите на Република Македонија и ќе постапувам чесно, совесно и беспристрасно“ рече Јовески.
Тој не сакаше да прецизира кој е првиот случај за кој ќе се фати со работа.
„Оставете неколку дена да видиме кои се приоритетите на обвинителството“ нагласи Јовески.
Новиот јавен обвинител додаде дека е подобрена соработката со СЈО и дека таа ќе продолжи согласно законските можности.