ДОМ предложи мерки против загадувањето на воздухот

Македонија се гуши во смог со астрономски вредности и секое намалување на загадувањето значи спасено здравје и живот на граѓаните. Да не се обесхрабруваме дека не можеме да го сведеме загадувањето на нула, туку да дејствуваме за намалување на штетите со итни мерки, а паралелно со нив да ги започнеме среднорочните и долгорочните мерки, велат од Демократската обнова на Македонија.

Од таму предлагаат неколку мерки кои бараат да почнат да се спроведуваат уште денеска и тоа: воведување пар-непар режим за возилата, бесплатен јавен превоз, забрана за тешки товарни возила низ град, забрана за возила под Еуро 4 стандард, затворање на градилиштата, преполовување на производството на индустриските објекти што загадуваат, редовно собирање на отпадот и редовно миење на улиците.

Од партијата уште предлагаат и зголемени инспекциски контроли на општинските и државните инспектори за животна средина и ослободување од работа на бремените жени и лицата со респираторни и кардиоваскуларни болести.

ДОМ предлага и среднорочни мерки за период од 1 до 3 месеции тоа носење на Законот за урбано зеленило кој е во собраниска процедура, пропишување листа на дозволени горива во домаќинствата и индустријата (со забрана за нееколошки пелети со лепила), теренска контрола за почитување на листата од страна на комунални и инспектори за животна средина, субвенции за печки на пелети, сончеви панели за топла вода, изолација на домовите, субвенции за вградување плински уреди во возила што загадуваат, субвенции за хибридни и електрични возила, зголемување на возниот парк во јавниот превоз со електрични автобуси

и набавка на опрема за уништување на медицински и друг биолошки отпад во Дрисла(што е обврска на концесионерот).